أمي
مشت مع أمها!!ا
من شوية اتصلت بصاحبتي…رد عليا خوها …قلتله فلانة قاعدة؟…قالي لا طلعت مع امها!!ا
انا ما فيش حاجة تنرفز فيا في الدنيا هادي اكتر من لما نسمع حد يتكلم عن امه ولا بوه بالشكل هادا..كأنهم يتحشمو يقولو امي وبوي…طبعا هادي حاجة خاصة بالرجالة والشباب الليبيين دون البنات والنساوين…وهادو بعضهم يكسرو الرقبة لما الوحدة منهم تقول ماااماا والا بااااباااا…بسبب وبدون سبب…نقصد الطريقة اللي ينطقو بيه الكلمة….حلال الواحد يشد يعفجهم باش ينشحطو شوية….مش عارفة …ممكن هادا مفهومهم للرقة والدلع…بس برضو بالنسبالي هما احسن بواجد من اللي يقولك العزوز والشيباني…والا كان راجل مؤدب يقولك الحاج والحاجة…وعاد كان زاهيتله الحمامة والا راضي عليهم يقولك الحويجة والحويج…عاد هادا أقصى ما يقدر عليه…ما تكونوش طماعين الراجل تنازل ودلعهم..شني مزال تبو؟ ..اما ناس ما تمشيش الا بالعين الحمرا فعلاً
مش قادرة نفهم شنو سبب المشكلة…هل الراجل الليبي يحس انه صغير..والا شكله عبيط لما يقول امي وبوي؟ يعني شني يبي يوصل من معلومة لما يقول الشيباني؟..انه كبر ومعاش للشيباني اللي كان يناديه بوي في يوم من الايام معاش ليه هاديكا الرهبة؟ والا انهم بدو انداد؟
نتفكر واحد جزائري كان يقرا معاي…كان مرة يحكيلنا في حاجة على بوه ، قال : الحاج عندي يبيني نولي…وبعدين سكت وتلفت لقانا كلنا بنات اللي حوليه…قال:آه مافيش ولاد ..باهي… قصدي بابا يبيني نولي..وكمل قصته …الباين ان الحكاية معدية فعلا
لو حد يعرف شنو السبب اللي يخلي الراجل الليبي يتحشم يقول امي والا بوي ينورني معاه… انا وحدة من الناس أغلب الوقت ما نقولش ماما وبابا…الحق نفضل النسخة الليبية 😉 نقول أمي و بوي…نحسها أحلى… مش عارفة شنو رايكم انتو؟